FAFUTUKAR FATATTAKAR FATARA
Yayinda ranakun fitar ƙasurgumin shirin nan na ƙasar Indiya wanda jarumi Shamharu zai jagoranta mai suna Fatattaka ke ƙara kusantowa, masoyan jarumin a ƙarƙashin ƙungiyar masoyansa na nan sun shirya fafutukar fatattakar fatarar da ke fafarar fina-finan jarumin a 'yan shekarun nan. Izuwa yanzu dai kimanin masoya dubu ɗari biyar ne suka shirya tsaf domin kallon wannan ƙasaitaccen shiri a ranar farko a birane kimanin ɗari biyu a faɗin ƙasar. A dai dai lokacin da ake wannan fafutuka ne kuma muka hango wasu dandazon makallatan daga wasu ƙasashen waje su ma sun zage damtse wajen siye tikitan kallon shirin. Izuwa yanzu dai ana hasashen cewa shirin zai iya kafa tarihin da babu kamarsa a kasuwancin ƙasashen ƙetare da kuma cikin gida. Sai dai kuma fa, akwai yiwuwar fim ɗin ya iya fuskantar cikas duba da irin yadda masu hauragiya da hauma-haumar ƙiyayyar iska suke ta ci gaba da caccakar shirin da jarumansa a ƙoƙarinsu na ganin sun ɓaro jirgin tun kafin ya yi nisa. Shin ko Shamharu da masoyansa za su iya fatattakar maƙiya ta hanyar fatali da fatarar da ke ziyartar Fina-finan jarumin? Lokaci ne kawai zai tabbatar mana.
# haimanraees #srkuniverse #Pathaan
