SHAH RUKH KHAN DA BOLLYWOOD 03

SHAH RUKH KHAN DA BOLLYWOOD 03

RUBUTAWA: Anupama Chopra 

FASSARAWA: Haiman Raees 

ABBAS MUSTAN: 'Yan uwa ne da ke bada umurnin fina-finai tare. 

YASH CHOPRA: Hamshaƙin mai shirya fina-finan da ɗaukaka sosai kenan a Bollywood. 

B. R. CHOPRA: Yaya ne a wajen Yash kuma shi ma shirya fina-finan yake yi. 

ADITYA CHOPRA: Babban ɗa kenan a wajen Yash, shi ne ƙashin bayan tsayuwa da ɗaukakar kamfaninsu a duniya

KARAN JOHAR: Mai shirya fina-finan Indiya ne da yazo a ƙarni na biyu a zamunnan Bollywood kuma shi ne ya bada umurnin wasu fitattun fina-finan Shah Rukh. 

YASH JOHAR: Shi ne mahaifin Karan kuma shima babban mai shirya fina-finan Indiya ne, ya mutu a 2004

SOORAJ BARJATYA: Mai shirya fina-finan Indiya ne da ya zo a ƙarni na uku daga cikin zamunnan da ya kawo ci gaba da gyara sosai a shekarun 1990s da manyan fina-finansa. 

PRAHLAD KAKKAR: Ɗaya ne daga cikin fitattun masu bada umurnin tallace-tallace da ya yi aiki sosai da jarumi Shah Rukh.

AISHWARYA RAI: Tsohuwar Sarauniyar kyau ta duniya wacce ta zamo babbar jaruma daga baya. 

GULSHAN KUMAR: hamshaƙin ɗan kasuwa ne da ya zama 'Audio King of India' da 'yan daban Mumbai suka harbe shi ya mutu. 

ABU SALEM: Wani hamshaƙin ɗan daba ne da ya addabi Bollywood da barazana da kisa a shekarun 1990s.

DAWOOD IBRAHIM KASKAR: Babban ɗan daba ne a garin Mumbai, shi ake zargi da shirya tashin bam a 1993.

RAKESH MARIA: Babban ɗan sanda ne daga Mumbai, shi ne ya jagoranci binciken tashin bam ɗin. 

MOHAN BHISE: Shi ne mai tsaron Shah Rukh. 

CHHOTA SHAKEEL: Babban ɗan wasa ne a tawagar Dawood. 

SANTOSH SIVAN: sanannen mai bada umurni kuma mai horas da jarumai da suka yi aiki tare da 

 Shah Rukh.

HRITHIK ROSHAN: Ɗa a wajen Rakesh Roshan wanda ya samu ɗaukaka ta ban mamaki cikin dare ɗaya tun bayan fitowar fim ɗinsa na farko Kaho Naa . . . Pyaar Hai.

SANJAY LEELA BHANSALI: Fitaccen mai bada umurni ne a Bollywood da babu kamarsa a salo. 

BHARAT SHAH: Fitaccen mai yaɗa fina-finan Hindi ne shi, ana kuma kiran Bharat da suna Mr. Moneybags.

NAZIM RIZVI: Matsakaicin mai ɗaukar nauyi ne da aka kama su tare da Bharat Shah bisa harƙalla da 'yan daba.

MAFARKAN BOLLYWOOD. 

Mafarki ya zama gaske a Dalton. Wani ƙaramin gari ne da ke Georgia da ake yi wa laƙabi da 'carpet capi-tal of the world', wannan gari, gari ne mai cike da karamomi/mu'ujizozi. Bhavesh Sheth ya san hakan. 

Bhavesh, kakkauran mutum ne da ke yawan sa tabarau kuma yana da dunƙulallen gashi tare da himma a cikin lamaransa. Ya fita daban a Dalton. Yana ɗaya daga cikin ƙalilan ɗin indiyawan da ke zaune a wurin. Kaso biyu cikin yawan mutanen da ke rayuwa a wurin su 27,912 ne kawai suka zo daga yankin Asiya. Mafi yawancinsu likitoci ne, amma shi Bhavesh yana harkar masaukin baƙi ne. Mahaifinsa, Ramesh, shi ke kula da wani Super 8 Motel da ke kusa da cibiyar al'adu na Dalton. 

Sana'arsu ta ahali ce. Ramesh shi ne general manager yayin da shi kuma Bhavesh yake mataimakinsa. Matansu ma kan taimaka wajen kula da sana'ar tasu. Bhavesh bai taɓa zama a ƙasar Indiya ba. Mahaifinsa ya bar ƙasar ne tun a farkon 1970s, kuma an haifi Bhavesh ne a Canada a shekara ta 1974. Ramesh yana tafiya wurin da akwai aiki ne. Bhavesh ya girma ne a tsakanin Detroit, Houston, da Tennessee. Yakan ziyarci Indiya tare da iyayensa aduk lokacin da suke da halin zuwa, amma a 1999, an yi musu haɗin aura da wata mace mai suna Tejal wacce ita kuma a Gujarat aka haife ta kuma a can ta taso.  

Kamar dai sauran miliyoyin Indiyawa da ke ko'ina a duniya, Bhavesh yana alaƙantuwa da Indiya ne kawai ta hanyar fina-finan Hindi. Iyayensa na kallon su akai-akai, sau tari a bidiyo. Kwafin da ake siyarwa na satar fasaha duk da rashin fitowarsa sosai, hakan bai hana a siya a kalla. Duk sa'adda Amitabh Bachchan yayi wata mutuwa a cikin fim, Bhavesh wanda a wancan lokacin bai fi shekara tara ba, sai ya yi ta rusa kuka. Ramesh sai ya rarrashe shi tare da tabbatar masa da cewa hamshaƙin jarumin ba mutuwar gaske ya yi ba, mutuwar ba'a ce ya yi domin ya sake dawowa watarana ya mishaɗantar da su. A Yayinda yake ƙara girma Bhavesh ya ci gaba da kallon fina-finan Hindi sosai. Ita ma Tejal masoyiyar fina-finan ce, haka ma ɗansu Kishan wanda aka haifa a 2002, shi kam saboda son su ma tun kan ya fara iya magana ya fara kallon su. Hakan yasa a lokacin da aka fara shagalin taron rawa da waƙa na Temptation a 2004 ya zama babu zaɓi face kawai su halarta. Shi wannan shagali an shirya shi ne tare da manyan jaruman Bollywood a Gwinnett Center da ke Atlanta. Haka Bhavesh ya siyar da kyautukan zagayowar ranar haihuwarsa, da kyautukan ranar aurensa duka ya siya tikitai akan farashin dala $150 kowanne. Saboda a lokacin da ya kira, fitattun kujerun da ke kan farashin dala $200 tuni an siye su. 

Temptation shagali ne irin na haɗakar jaruman Bollywood yayin da suke hawan fitattun waƙoƙin fina-finai tare da rawa, barkwanci da kuma haɗuwa da masoyan jaruman. Manyan jarumai guda shida ne suka halarci shagalin, kowanne da irin yanayi da salon da ya ɗauka. Amma wanda ya fi kowa jan hankali shi ne Shah Rukh Khan. An shirya zagayen wannan shagali ne akan cewa za a yi watanni biyu ana yinsa a cikin manyan birane shida a tsakanin Europe, United Kingdom, United States, da Canada. Kowane taro daga cikinsu yana ɗaukar mutane a ƙalla daga 7,000 zuwa 20,000. Mafi tsadar tikitan kuma an siyar da su ne akan kuɗi kimanin dala $300 zuwa dala $400, amma tsadar su bai hana masoya zuwa ba, a Toronto sai da aka kori mutane da dama a ƙaton filin Air Canada Centre wanda ke ɗaukar a ƙalla mutane 19,800, inda a ƙarshe dai dole aka shirya taro na biyu bayan kwanaki uku da yin na farkon. Haka ma aka yi London, can ma sai da aka yi taruka biyu a jere. A Antwerp ma an cike ɗakin taron da Indiya waɗanda ke zaune a can. Indiyawa ne da aka kawo su ƙasar Holland ta yankin gabas a tsakanin Shekarun 1873 da 1916 domin yin aikin ƙarfi. 

Amma duk da cewa an daƙile kusantuwarsu da Indiya na tsawon zamunna hakan bai dusashe soyayyarsu wa Bollywood ba. Kamar yadda mai shirya fina-finai Nasreen Munni Kabir ta bayyana a fim ɗinta mai suna The Outer World of Shah Rukh Khan, ana yi wa jaruman Bollywood soyayya kamar yadda ake yi wa mawaƙi Elvis. Masoya masu magana da harshen turanci sun tsaya ƙyam a zaurukan otal-otal da misalin ƙarfe 2 a.m. Domin su samu damar ganin jarumansu. A yayin gabatar da taron kuwa, 'yan mata ne suke kuka da hawaye suna cewa “Muna sonka Shah Rukh Khan!” 

Masu shirya taruka na yankin sun ce sai da suka dinga ƙin karɓar tayin dala $2,000 domin samun damar shiga wurin fita ta baya. A Mujallar Time Magazine ta yankin Asiya wacce ke ɗauke da hoton Shah Rukh a bangonta kuma take ɗauke da bayanan jaruman yankin Asiya, jaridar ta ruwaito cewa mai tsaron jarumi Shah Rukh wanda yake ƙaton mutum ne mai molo akansa yana kuma da 'ya'ya mata biyu a gida, yace mata da yawa sun kawo masa tallan kansu in yana so ya kwana da su ta yadda abin ma har ya zama ya dame shi. 

Zan ci gaba in sha Allah 

Haiman Raees

#haimanraees